nahin aasan kisi ke waste taKHmina mera

nahīñ āsāñ kisī ke vāste taḳhmīna merā

muqarrar hai dayār-e-ġhaib se rozīna merā

dam-e-ruḳhsat agar maiñ hausle se kaam letā

palaT kar dekh saktā thā use ā.īna merā

hadaf ban pā.eñgī āñkheñ na mere dushmanoñ kī

muqābil hai ḳhadañg-e-ḳhvāb ke ab siina merā

paḌā rahtā huuñ kunj-e-āfiyat meñ sar chhupā kar

guzar jaatā hai yuuñ hī sabt aur ādīna merā

buḌhāpā chhā rahā hai mere har jazbe pe lekin

javāñ hotā chalā jaatā hai phir bhī kiina merā

badal saktā thā mere shahr kā āhañg 'sājid'

agar tartīb pā saktā kabhī sāzīna merā

nahin aasan kisi ke waste taKHmina mera

muqarrar hai dayar-e-ghaib se rozina mera

dam-e-ruKHsat agar main hausle se kaam leta

palaT kar dekh sakta tha use aaina mera

hadaf ban paengi aankhen na mere dushmanon ki

muqabil hai KHadang-e-KHwab ke ab sina mera

paDa rahta hun kunj-e-afiyat mein sar chhupa kar

guzar jata hai yun hi sabt aur aadina mera

buDhapa chha raha hai mere har jazbe pe lekin

jawan hota chala jata hai phir bhi kina mera

badal sakta tha mere shahr ka aahang 'sajid'

agar tartib pa sakta kabhi sazina mera