nahin badle dar-o-diwar-e-zindan aao diwano

nahīñ badle dar-o-dīvār-e-zindāñ aao dīvāno

jo pahle the vahī haiñ sāz-o-sāmāñ aao dīvāno

tum aise sar-phiroñ kī justujū hai tauq-e-āhan ko

bulātī hai tumheñ zanjīr-e-zindāñ aao dīvāno

koī lazzat-shanās-e-ābla-pā.ī nahīñ miltā

tarastā hai har ik ḳhār-e-bayābāñ aao dīvāno

har ik dāġh-e-jigar lau de uThe tārīkī-e-shab meñ

kareñ is rang se jashn-e-charāġhāñ aao dīvāno

diloñ meñ sho'la-e-soz-e-yaqīñ hai ‘azm-e-mohkam bhī

kareñ tārīk zarroñ ko daraḳhshāñ aao dīvāno

ye maanā mushkilāt-e-nau-ba-nau ik ik qadam par haiñ

kareñ mil-jul ke har mushkil ko āsāñ aao dīvāno

chalo chal kar suneñ 'maġhmūm' se taaza ġhazal us kī

vo apnī tarz kā hai ik suḳhan-dāñ aao dīvāno

nahin badle dar-o-diwar-e-zindan aao diwano

jo pahle the wahi hain saz-o-saman aao diwano

tum aise sar-phiron ki justuju hai tauq-e-ahan ko

bulati hai tumhein zanjir-e-zindan aao diwano

koi lazzat-shanas-e-abla-pai nahin milta

tarasta hai har ek KHar-e-bayaban aao diwano

har ek dagh-e-jigar lau de uThe tariki-e-shab mein

karen is rang se jashn-e-charaghan aao diwano

dilon mein sho'la-e-soz-e-yaqin hai ‘azm-e-mohkam bhi

karen tarik zarron ko daraKHshan aao diwano

ye mana mushkilat-e-nau-ba-nau ek ek qadam par hain

karen mil-jul ke har mushkil ko aasan aao diwano

chalo chal kar sunen 'maghmum' se taza ghazal us ki

wo apni tarz ka hai ek suKHan-dan aao diwano