nahin gham gar KHafa sara jahan hai

nahīñ ġham gar ḳhafā saarā jahāñ hai

ḳhudā kā shukr hai vo mehrbāñ hai

yahāñ fariyād kī tāqat kahāñ hai

vo nāhaq apne dil meñ bad-gumāñ hai

nahīñ kuchh ishq mohtāj-e-bayāñ hai

hamārā haal sūrat se ayaañ hai

niyāz-o-nāz ishq-o-husn dekho

hamārā sar hai un kā āstāñ hai

vafādārī meñ gar be-misl haiñ ham

sitam meñ vo bhī yaktā-e-zamāñ hai

haqīqat meñ sitam-ījād tum ho

abas kuchh josh par tab-e-ravāñ hai

vazīfa hai mujhe to naam un kā

ki har-dam hijr meñ vird-e-zabāñ hai

hameñ to haal kahnā maut Thahrā

tumhāre vāste ik dāstāñ hai

yahāñ maiñ hijr meñ ghabrā rahā huuñ

ḳhudā ma.alūm vo is dam kahāñ hai

haqīqat meñ nigāheñ kah rahī haiñ

nihāñ jis ko samajhte ho ayaañ hai

nazar ke saath tum bhī phir ga.e ho

vo pahlī sī mohabbat ab kahāñ hai

hamāre vāste hai khel marnā

unheñ gar qatl āshiq kā ravāñ hai

sukūn-e-dil kabhī hāsil na hogā

hamāre sar pe jab tak āsmāñ hai

adū jhijkā to vo kahte haiñ us se

chale aao tumhārā hī makāñ hai

koī utrā na is ke paar ab tak

ki dariyā-e-mohabbat be-karāñ hai

vo kahte haiñ mirī turbat par aa kar

ye mere kushta-e-ġham kā nishāñ hai

qazā aa.ī hai jo jā.ūñ vahāñ par

malak-ul-maut un kā pāsbāñ hai

tabī.at hai vahī ab bhī hamārī

magar vo aap kī ulfat kahāñ hai

na 'hājir' ko faqat dehlī kā samjho

ki ab vo shā.ir-e-hindostāñ hai

nahin gham gar KHafa sara jahan hai

KHuda ka shukr hai wo mehrban hai

yahan fariyaad ki taqat kahan hai

wo nahaq apne dil mein bad-guman hai

nahin kuchh ishq mohtaj-e-bayan hai

hamara haal surat se ayan hai

niyaz-o-naz ishq-o-husn dekho

hamara sar hai un ka aastan hai

wafadari mein gar be-misl hain hum

sitam mein wo bhi yakta-e-zaman hai

haqiqat mein sitam-ijad tum ho

abas kuchh josh par tab-e-rawan hai

wazifa hai mujhe to nam un ka

ki har-dam hijr mein wird-e-zaban hai

hamein to haal kahna maut Thahra

tumhaare waste ek dastan hai

yahan main hijr mein ghabra raha hun

KHuda malum wo is dam kahan hai

haqiqat mein nigahen kah rahi hain

nihan jis ko samajhte ho ayan hai

nazar ke sath tum bhi phir gae ho

wo pahli si mohabbat ab kahan hai

hamare waste hai khel marna

unhen gar qatl aashiq ka rawan hai

sukun-e-dil kabhi hasil na hoga

hamare sar pe jab tak aasman hai

adu jhijka to wo kahte hain us se

chale aao tumhaara hi makan hai

koi utra na is ke par ab tak

ki dariya-e-mohabbat be-karan hai

wo kahte hain meri turbat par aa kar

ye mere kushta-e-gham ka nishan hai

qaza aai hai jo jaun wahan par

malak-ul-maut un ka pasban hai

tabiat hai wahi ab bhi hamari

magar wo aap ki ulfat kahan hai

na 'hajir' ko faqat dehli ka samjho

ki ab wo shair-e-hindostan hai