nahin hai aashiyan lekin hai KHak-e-ashiyan baqi

nahīñ hai āshiyāñ lekin hai ḳhāk-e-āshiyāñ baaqī

zamāne meñ mohabbat kā abhī tak hai nishāñ baaqī

baḌī hasrat se merā tazkira karte haiñ vo aksar

hai mere ba.ad bhī sad-shukr merī dāstāñ baaqī

zamāna aisā kuchh badlā hai ham tīra-nasīboñ kā

na jaada hai na manzil aur na manzil kā nishāñ baaqī

chaman vāloñ kā ehsās-e-ġhulāmī jaag uTThā hai

nahīñ rah saktī ab to ye jafā-e-bāġhbāñ baaqī

nuqūsh-e-sajda ko mere hiqārat se na dekho tum

inhīñ sajdoñ kī tābish se hai husn-e-dāstāñ baaqī

sulūk aisā kiyā ai bāġhbāñ terī nigāhoñ ne

gulistāñ meñ nahīñ hai ab bahār-e-gulsitāñ baaqī

muḳhālif bāġhbāñ ho yā falak bezār ho ham se

rahegā hashr tak apnā chaman meñ āshiyāñ baaqī

gayā vo vaqt jab milte the aapas meñ mohabbat se

diloñ meñ ab se ai 'sājid' ḳhulūs-e-dil kahāñ baaqī

nahin hai aashiyan lekin hai KHak-e-ashiyan baqi

zamane mein mohabbat ka abhi tak hai nishan baqi

baDi hasrat se mera tazkira karte hain wo aksar

hai mere baad bhi sad-shukr meri dastan baqi

zamana aisa kuchh badla hai hum tira-nasibon ka

na jada hai na manzil aur na manzil ka nishan baqi

chaman walon ka ehsas-e-ghulami jag uTTha hai

nahin rah sakti ab to ye jafa-e-baghban baqi

nuqush-e-sajda ko mere hiqarat se na dekho tum

inhin sajdon ki tabish se hai husn-e-dastan baqi

suluk aisa kiya ai baghban teri nigahon ne

gulistan mein nahin hai ab bahaar-e-gulsitan baqi

muKHalif baghban ho ya falak bezar ho hum se

rahega hashr tak apna chaman mein aashiyan baqi

gaya wo waqt jab milte the aapas mein mohabbat se

dilon mein ab se ai 'sajid' KHulus-e-dil kahan baqi