nahin hai fikr tujhe fikr-e-ma-siwa ke siwa

nahīñ hai fikr tujhe fikr-e-mā-sivā ke sivā

hazār but haiñ tire dil meñ ik ḳhudā ke sivā

nahīñ jo zabt kī taufīq de ḳhudā ke sivā

ki laakh ġham bhī haiñ umr-e-gurez-pā ke sivā

tamām maslihateñ vaqf haiñ ḳhirad ke liye

nahīñ hai sheva-e-ahl-e-junūñ vafā ke sivā

ilāj-e-dil ke liye aur ab kahāñ jaa.eñ

tumhāre shahr meñ sab kuchh milā davā ke sivā

vo muddatoñ meñ mile bhī to uf re mahrūmī

sabhī kuchh un se kahā harf-e-mudda.ā ke sivā

mirā shi.ār hai ai dost ġham-farāmoshī

mujhe to yaad nahīñ kuchh tirī atā ke sivā

the merī raah meñ lākhoñ butān-e-naḳhvat-o-nāz

kahīñ bhī sar na jhukā tere naqsh-e-pā ke sivā

bahut se ġham to diye 'zabt' aise logoñ ne

ki jin se koī tavaqqo na thī vafā ke sivā

nahin hai fikr tujhe fikr-e-ma-siwa ke siwa

hazar but hain tere dil mein ek KHuda ke siwa

nahin jo zabt ki taufiq de KHuda ke siwa

ki lakh gham bhi hain umr-e-gurez-pa ke siwa

tamam maslihaten waqf hain KHirad ke liye

nahin hai shewa-e-ahl-e-junun wafa ke siwa

ilaj-e-dil ke liye aur ab kahan jaen

tumhaare shahr mein sab kuchh mila dawa ke siwa

wo muddaton mein mile bhi to uf re mahrumi

sabhi kuchh un se kaha harf-e-muddaa ke siwa

mera shiar hai ai dost gham-faramoshi

mujhe to yaad nahin kuchh teri ata ke siwa

the meri rah mein lakhon butan-e-naKHwat-o-naz

kahin bhi sar na jhuka tere naqsh-e-pa ke siwa

bahut se gham to diye 'zabt' aise logon ne

ki jin se koi tawaqqo na thi wafa ke siwa