nahin hai is nind ke nagar mein abhi kisi ko dimagh mera

nahīñ hai is niiñd ke nagar meñ abhī kisī ko dimāġh merā

magar kisī ḳhvāb ke safar meñ sipar kareñge charāġh merā

sabāhat-e-sham-o-ā.ina se huī hai merī numūd lekin

sitāra o āsmāñ se bāhar kahīñ milegā surāġh merā

taḌap uThī hai kisī nagar meñ qayām karne se ruuh merī

sulag rahā hai kisī masāfat kī be-kalī se dimāġh merā

jarāhat-e-vasl ne khilā.e haiñ zulmat-e-shām meñ sitāre

matā-e-hijrāñ kī chāñdnī se bharā huā hai ayāġh merā

lipaT rahī hai fasīl kī burjiyoñ se ik shahr kī nigāheñ

aur ek dīvār-e-ā.īna par jhukā huā hai charāġh merā

ye kaisī sat.h-e-ravāñ pe 'sājid' dharī huī hai zamīn merī

ki jhūmtā hai kisī sitāre ke saañs lene se baaġh merā

nahin hai is nind ke nagar mein abhi kisi ko dimagh mera

magar kisi KHwab ke safar mein sipar karenge charagh mera

sabahat-e-sham-o-aina se hui hai meri numud lekin

sitara o aasman se bahar kahin milega suragh mera

taDap uThi hai kisi nagar mein qayam karne se ruh meri

sulag raha hai kisi masafat ki be-kali se dimagh mera

jarahat-e-wasl ne khilae hain zulmat-e-sham mein sitare

mata-e-hijran ki chandni se bhara hua hai ayagh mera

lipaT rahi hai fasil ki burjiyon se ek shahr ki nigahen

aur ek diwar-e-aina par jhuka hua hai charagh mera

ye kaisi sath-e-rawan pe 'sajid' dhari hui hai zamin meri

ki jhumta hai kisi sitare ke sans lene se bagh mera