nahin hai roTi mayassar agar hawa to hai

nahīñ hai roTī mayassar agar havā to hai

ḳhudā kā shukr ki khāne ko kuchh bachā to hai

na bādbān na kashtī kā nāḳhudā koī

maiñ mutma.in huuñ muhāfiz mirā ḳhudā to hai

ye aur baat na irsāl kar sakūñ tum ko

tumhāre naam magar ek ḳhat likhā to hai

usī ke naam kī taḳhtī lagā.ī hai dil par

muqīm is meñ vo āḳhir kabhī rahā to hai

khilā jo phuul to ḳhushbū nikal ga.ī saarī

bhare chaman meñ koī hādisa huā to hai

ḳhudā kare ki ye ab un ke shahr se guzre

havā ke dosh pe maktūb ik rakhā to hai

vo mere naam pe 'sādiq-jamīl' yuuñ bole

bhalā sā naam ye maiñ ne kahīñ sunā to hai

nahin hai roTi mayassar agar hawa to hai

KHuda ka shukr ki khane ko kuchh bacha to hai

na baadban na kashti ka naKHuda koi

main mutmain hun muhafiz mera KHuda to hai

ye aur baat na irsal kar sakun tum ko

tumhaare nam magar ek KHat likha to hai

usi ke nam ki taKHti lagai hai dil par

muqim is mein wo aaKHir kabhi raha to hai

khila jo phul to KHushbu nikal gai sari

bhare chaman mein koi hadisa hua to hai

KHuda kare ki ye ab un ke shahr se guzre

hawa ke dosh pe maktub ek rakha to hai

wo mere nam pe 'sadiq-jamil' yun bole

bhala sa nam ye main ne kahin suna to hai