نہیں ہجر کا تیرے غم جانتا ہوں

نہیں ہجر کا تیرے غم جانتا ہوں

تجھے دل سے ہر دم بہم جانتا ہوں

ستم کو ترے کب ستم جانتا ہوں

عنایات لطف و کرم جانتا ہوں

تو انجان ہوتا ہے کیوں مجھ سے جاناں

بھلا جان سے کیا میں کم جانتا ہوں

دوئی دور ہوتی ہے جس وقت دل سے

یہ تن اپنا بیت الحرم جانتا ہوں

مجھے کام دیر و حرم سے نہیں ہے

یہی صورت اپنی صنم جانتا ہوں

دو عالم کی ہستی ہے موہوم ساری

جسے دیکھتا ہوں عدم جانتا ہوں

ترے ذکر سے ہوں میں خاموش لیکن

بدل فکر سے دم بدم جانتا ہوں