nahin hota ubur-e-bahr-e-gham aasan nahin hota

nahīñ hotā ubūr-e-bahr-e-ġham āsāñ nahīñ hotā

kabhī kashtī nahīñ hotī kabhī sāmāñ nahīñ hotā

jise fikr-e-ma.āl-e-gardish-e-daurāñ nahīñ hotā

use insāñ nahīñ kahte haiñ vo insāñ nahīñ hotā

nahīñ hotā dil-e-nāshād kā darmāñ nahīñ hotā

kisī sūrat nahīñ hotā kisī unvāñ nahīñ hotā

munavvar jis ke dil meñ āriz-e-jānāñ nahīñ hotā

mirī dānist meñ vo hāfiz-e-qur.āñ nahīñ hotā

yahāñ dil hī nahīñ rakhte ki armānoñ kā jhagḌā ho

ḳhudā jaane ki kyā hotā hai kyā armāñ nahīñ hotā

tarīqat kī ḳhabar kyā us ko vo kyā ma.arifat jaane

kabhī vaa.iz sharīk-e-mahfil-e-rindāñ nahīñ hotā

ye pichhlī shab ke aañsū bhī ajab tāsīr rakhte haiñ

kabhī mahrūm-e-rahmat dīda-e-giryāñ nahīñ hotā

numāyāñ huuñ gunahgāroñ meñ lekin phir bhī nādim huuñ

tirī shān-e-karīmī ke koī shāyāñ nahīñ hotā

sabhī kuchh hai ġham-o-andoh-o-yās-o-hasrat-o-armāñ

tirā āshiq gadā-e-be-sar-o-sāmāñ nahīñ hotā

tirī rahmat ke motī ban ke barse jab kabhī barse

sarishk-ālūd isyāñ-kār kā dāmāñ nahīñ hotā

hamesha āfiyat hī bā.is-e-āfāt hotī hai

jahāñ sāhil nahīñ hotā vahāñ tūfāñ nahīñ hotā

gadā-e-mai-kada huuñ do-jahāñ haiñ mere dāman meñ

mujhe to shikva-e-kotāhī-e-dāmāñ nahīñ hotā

nahīñ miltā jise faiz-e-janāb-e-sāqī-e-kausar

mayassar us ko 'shāġhil' bāda-e-irfāñ nahīñ hotā

nahin hota ubur-e-bahr-e-gham aasan nahin hota

kabhi kashti nahin hoti kabhi saman nahin hota

jise fikr-e-maal-e-gardish-e-dauran nahin hota

use insan nahin kahte hain wo insan nahin hota

nahin hota dil-e-nashad ka darman nahin hota

kisi surat nahin hota kisi unwan nahin hota

munawwar jis ke dil mein aariz-e-jaanan nahin hota

meri danist mein wo hafiz-e-quran nahin hota

yahan dil hi nahin rakhte ki armanon ka jhagDa ho

KHuda jaane ki kya hota hai kya arman nahin hota

tariqat ki KHabar kya us ko wo kya marifat jaane

kabhi waiz sharik-e-mahfil-e-rindan nahin hota

ye pichhli shab ke aansu bhi ajab tasir rakhte hain

kabhi mahrum-e-rahmat dida-e-giryan nahin hota

numayan hun gunahgaron mein lekin phir bhi nadim hun

teri shan-e-karimi ke koi shayan nahin hota

sabhi kuchh hai gham-o-andoh-o-yas-o-hasrat-o-arman

tera aashiq gada-e-be-sar-o-saman nahin hota

teri rahmat ke moti ban ke barse jab kabhi barse

sarishk-alud isyan-kar ka daman nahin hota

hamesha aafiyat hi bais-e-afat hoti hai

jahan sahil nahin hota wahan tufan nahin hota

gada-e-mai-kada hun do-jahan hain mere daman mein

mujhe to shikwa-e-kotahi-e-daman nahin hota

nahin milta jise faiz-e-janab-e-saqi-e-kausar

mayassar us ko 'shaghil' baada-e-irfan nahin hota