nahin ki apni tabahi ka raaz ko gham hai

nahīñ ki apnī tabāhī kā 'rāz' ko ġham hai

tumhārī zahmat-e-ahd-e-karam kā mātam hai

nisār-e-jalva dil-o-dīñ zarā naqāb uThā

vo ek lamha sahī ek lamha kyā kam hai

kisī ne chaak kiyā hai guloñ kā pairāhan

shuā-e-mehr tujhe e'timād-e-shabnam hai

qazā kā ḳhauf hai achchhā magar is aafat meñ

ye mo.ajiza bhī ki ham jī rahe haiñ kyā kam hai

vo raqs-e-sho.ala vo soz-o-gudāz-e-parvāna

jidhar charāġh haiñ raushan ajiib aalam hai

hudūd-e-dair-o-haram se guzar chukā shāyad

ki ab ijāzat-e-sajda hai aur paiham hai

shamīm-e-ġhuncha-o-gul rañg-e-lāla naġhma-e-mauj

tire jamāl kī jo sharh hai vo mub.ham hai

latāfatoñ se zamāna bharā paḌā hai magar

mirī nazar kī zarūrat se kis qadar kam hai

fareb dil ne mohabbat meñ khaa.e haiñ kyā kyā

har ik fareb par ab tak yaqīn-e-mohkam hai

mirī nigāh kahāñ tak javāb de āḳhir

tirī nigāh kā har har savāl mub.ham hai

abhī to apnī nigāhoñ ke iltifāt ko rok

abhī to manzar-e-hastī tamām mub.ham hai

nahin ki apni tabahi ka 'raaz' ko gham hai

tumhaari zahmat-e-ahd-e-karam ka matam hai

nisar-e-jalwa dil-o-din zara naqab uTha

wo ek lamha sahi ek lamha kya kam hai

kisi ne chaak kiya hai gulon ka pairahan

shua-e-mehr tujhe e'timad-e-shabnam hai

qaza ka KHauf hai achchha magar is aafat mein

ye moajiza bhi ki hum ji rahe hain kya kam hai

wo raqs-e-shoala wo soz-o-gudaz-e-parwana

jidhar charagh hain raushan ajib aalam hai

hudud-e-dair-o-haram se guzar chuka shayad

ki ab ijazat-e-sajda hai aur paiham hai

shamim-e-ghuncha-o-gul rang-e-lala naghma-e-mauj

tere jamal ki jo sharh hai wo mubham hai

latafaton se zamana bhara paDa hai magar

meri nazar ki zarurat se kis qadar kam hai

fareb dil ne mohabbat mein khae hain kya kya

har ek fareb par ab tak yaqin-e-mohkam hai

meri nigah kahan tak jawab de aaKHir

teri nigah ka har har sawal mubham hai

abhi to apni nigahon ke iltifat ko rok

abhi to manzar-e-hasti tamam mubham hai