nahin kuchh abr hi shagird meri ashk-bari ka

nahīñ kuchh abr hī shāgird merī ashk-bārī kā

sabaq letī hai mujh se barq bhī aa be-qarārī kā

chaman meñ aisī hī naġhma-sarā.ī kī ki bulbul ko

sarīr-ārā-e-gulshan ne diyā ḳhil.at hazārī kā

sahāb-e-surḳh meñ is rang se chamkī nahīñ bijlī

jo hai jhumkā tire dāmān-e-rangīñ par kanārī kā

Tuk ai but apne mukhḌe se uThā de gosha-e-burqā

ki in masjid-nashīnoñ ko hai da.avā dīn-dārī kā

dikhā.ūñ gar tire kūche meñ ashk apne kī gul-rezī

tiḌaq jaave kaleja ashk se abr-e-bahārī kā

karūñ kyā tere bin dekhe maiñ ik dam rah nahīñ saktā

ki huuñ majbūr maiñ is amr meñ be-iḳhtyārī kā

na ab ārām hai dil ko na ḳhvāb āñkhoñ meñ aatā hai

samar 'bedār' mujh ko ye milā us gul kī yaarī kā

nahin kuchh abr hi shagird meri ashk-bari ka

sabaq leti hai mujh se barq bhi aa be-qarari ka

chaman mein aisi hi naghma-sarai ki ki bulbul ko

sarir-ara-e-gulshan ne diya KHilat hazari ka

sahab-e-surKH mein is rang se chamki nahin bijli

jo hai jhumka tere daman-e-rangin par kanari ka

Tuk ai but apne mukhDe se uTha de gosha-e-burqa

ki in masjid-nashinon ko hai dawa din-dari ka

dikhaun gar tere kuche mein ashk apne ki gul-rezi

tiDaq jawe kaleja ashk se abr-e-bahaari ka

karun kya tere bin dekhe main ek dam rah nahin sakta

ki hun majbur main is amr mein be-iKHtyari ka

na ab aaram hai dil ko na KHwab aankhon mein aata hai

samar 'bedar' mujh ko ye mila us gul ki yari ka