nahin kuchh intiha afsurdagi ki

nahīñ kuchh intihā afsurdagī kī

yahī hai rasm shāyad āshiqī kī

lab-e-lālīñ pe ye lahreñ hañsī kī

yahī Duube na kashtī zindagī kī

Dhale aañsū ki ye TuuTe sitāre

sukūt shab meñ yaad aa.ī kisī kī

chaman meñ buuTā buuTā dekhtā hai

adā.eñ in kī mastāna ravī kī

baḌhā.e jā qadam zauq talab meñ

shikāyat kar na ijz-o-ḳhastagī kī

isī kā naam shāyad zindagī hai

ḳhushī kī ik ghaḌī to ik ġhamī kī

sukūn-e-sāhil-e-dariyā kā armāñ

karo bāteñ na ye kam-himmatī kī

milā kar aañkh phir āñkheñ churānā

adā-e-ḳhās hai ye dilbarī kī

atā ho to atā ho dard aisā

ho lazzat jis meñ soz-e-dā.imī kī

abhī hai nūr-o-zulmat kī kashākash

abhī hai duur manzil āgahī kī

hayāt-e-chand-roza apnī 'najmī'

hai tasvīr-e-mujassam bebasī kī

nahin kuchh intiha afsurdagi ki

yahi hai rasm shayad aashiqi ki

lab-e-lalin pe ye lahren hansi ki

yahi Dube na kashti zindagi ki

Dhale aansu ki ye TuTe sitare

sukut shab mein yaad aai kisi ki

chaman mein buTa buTa dekhta hai

adaen in ki mastana rawi ki

baDhae ja qadam zauq talab mein

shikayat kar na ijz-o-KHastagi ki

isi ka nam shayad zindagi hai

KHushi ki ek ghaDi to ek ghami ki

sukun-e-sahil-e-dariya ka arman

karo baaten na ye kam-himmati ki

mila kar aankh phir aankhen churana

ada-e-KHas hai ye dilbari ki

ata ho to ata ho dard aisa

ho lazzat jis mein soz-e-daimi ki

abhi hai nur-o-zulmat ki kashakash

abhi hai dur manzil aagahi ki

hayat-e-chand-roza apni 'najmi'

hai taswir-e-mujassam bebasi ki