nahin malum kya wajib hai kya farz

nahīñ mālūm kyā vājib hai kyā farz

mire maz.hab meñ hai terī razā farz

shu.ūr-e-hastī-e-mauhūm hai kufr

fanā ba.ad-e-fanā ba.ad-e-fanā farz

nahīñ āgāh mast-e-bāda-e-shauq

kahāñ sunnat kidhar vājib kujā farz

reh-e-taslīm meñ az-rū-e-fatvā

duā vājib pa tark-e-mudda.ā farz

na chhūTe kufr meñ bhī vaz-e-īmāñ

ki har hālat meñ hai yād-e-ḳhudā farz

nahīñ dekhā kisī ne husn-e-mastūr

ba-qadr-e-fahm lekin kar liyā farz

na mānūñgā na mānūñgā kabhī maiñ

mujhe karte haiñ kyuuñ us se judā farz

na kholūñgā na kholūñgā zabāñ ko

ki hai iḳhfā-e-rāz-e-dilrubā farz

balā se koī maane yā na maane

chalo ham kar chuke apnā adā farz

nahin malum kya wajib hai kya farz

mere mazhab mein hai teri raza farz

shuur-e-hasti-e-mauhum hai kufr

fana baad-e-fana baad-e-fana farz

nahin aagah mast-e-baada-e-shauq

kahan sunnat kidhar wajib kuja farz

reh-e-taslim mein az-ru-e-fatwa

dua wajib pa tark-e-muddaa farz

na chhuTe kufr mein bhi waz-e-iman

ki har haalat mein hai yaad-e-KHuda farz

nahin dekha kisi ne husn-e-mastur

ba-qadr-e-fahm lekin kar liya farz

na manunga na manunga kabhi main

mujhe karte hain kyun us se juda farz

na kholunga na kholunga zaban ko

ki hai iKHfa-e-raaz-e-dilruba farz

bala se koi mane ya na mane

chalo hum kar chuke apna ada farz