nahin malum paenge sukun ahl-e-jahan kab tak

nahīñ mā'lūm pā.eñge sukūñ ahl-e-jahāñ kab tak

ḳhudā jaane rahegā is zamīñ par āsmāñ kab tak

ye afsāna abhī to zer-e-unvān-e-karam bhī hai

sunā.e jā.ūñ maiñ un ke sitam kī dāstāñ kab tak

qafas meñ to mujhe jab tak bhī rahnā ho magar yārab

tasavvur meñ mire jaltā rahegā āshiyāñ kab tak

zamīr ālūda-e-bātil zabāñ āzurda-e-nā-haq

tirī mahfil meñ rah kar ham milā.eñ haañ meñ haañ kab tak

ġhazab hai Thes lagnā 'ishq kī ḳhuddār fitrat ko

bas ai chashm-e-karam ab iltifāt-e-rā.egāñ kab tak

dil-e-māyūs meñ kuchh ḳhār-e-hasrat se khaTakte haiñ

ḳhudā jaane raheñgī raakh meñ chingāriyāñ kab tak

nahīñ jab pās-e-va.ada to mukar bhī jāoge ik din

badal jā.egā jab dil to na badlegī zabāñ kab tak

kabhī ummīd kī nazroñ se dekh apnī taraf 'bismil'

nigāh-e-yās se dekhegā sū-e-asmāñ kab tak

nahin ma'lum paenge sukun ahl-e-jahan kab tak

KHuda jaane rahega is zamin par aasman kab tak

ye afsana abhi to zer-e-unwan-e-karam bhi hai

sunae jaun main un ke sitam ki dastan kab tak

qafas mein to mujhe jab tak bhi rahna ho magar yarab

tasawwur mein mere jalta rahega aashiyan kab tak

zamir aaluda-e-baatil zaban aazurda-e-na-haq

teri mahfil mein rah kar hum milaen han mein han kab tak

ghazab hai Thes lagna 'ishq ki KHuddar fitrat ko

bas ai chashm-e-karam ab iltifat-e-raegan kab tak

dil-e-mayus mein kuchh KHar-e-hasrat se khaTakte hain

KHuda jaane rahengi rakh mein chingariyan kab tak

nahin jab pas-e-wada to mukar bhi jaoge ek din

badal jaega jab dil to na badlegi zaban kab tak

kabhi ummid ki nazron se dekh apni taraf 'bismil'

nigah-e-yas se dekhega su-e-asman kab tak