nahin makan na sahi sar pe aasman to hai

nahīñ makāñ na sahī sar pe āsmān to hai

zamīñ pe hai dar-o-dīvār sā.ebān to hai

hazār mujh pe ġhamoñ ke pahāḌ TuuT paḌeñ

mujhe bachāne tirī yaad kī chaTān to hai

nahīñ ḳhudā.ī meñ koī bhī mehrbāñ na sahī

ḳhudā.ī jis kī hai vo mujh pe mehrbān to hai

nahīñ hai mujh ko koī da.avā-e-zabāñ-dānī

yahī bahut hai ki urdu mirī zabān to hai

mujhī pe aaj sitam haiñ bajā-e-lutf-o-karam

ḳhushī hai ye mujhe ik rabt darmiyān to hai

kareñ hazār burā.ī vo ġhair kī 'rāhī'

magar zamāne ko kyā kiije bad-gumān to hai

nahin makan na sahi sar pe aasman to hai

zamin pe hai dar-o-diwar saeban to hai

hazar mujh pe ghamon ke pahaD TuT paDen

mujhe bachane teri yaad ki chaTan to hai

nahin KHudai mein koi bhi mehrban na sahi

KHudai jis ki hai wo mujh pe mehrban to hai

nahin hai mujh ko koi dawa-e-zaban-dani

yahi bahut hai ki urdu meri zaban to hai

mujhi pe aaj sitam hain baja-e-lutf-o-karam

KHushi hai ye mujhe ek rabt darmiyan to hai

karen hazar burai wo ghair ki 'rahi'

magar zamane ko kya kije bad-guman to hai