nahin milta dila hum ko nishan tak

nahīñ miltā dilā ham ko nishāñ tak

makāñ DhūñD aa.e us kā lā-makāñ tak

banā har mū-e-tan ḳhār-e-muġhīlāñ

satāyā josh-e-vahshat ne yahāñ tak

hamārī jaan ke pīchhe paḌā hai

dil-e-nādāñ ko samjhā.eñ kahāñ tak

ravāñ shab ko huā kyā nāqa-e-rūh

nazar aa.ī na gard-e-kārvāñ tak

zamīñ pe zalzala aayā to pahuñchā

mire nāloñ kā ġhauġhā āsmāñ tak

mile hai dil ko zauq-e-bosa-e-lab

mazā hai varna har shai kā zabāñ tak

jo rakhte the dimāġh apnā falak par

zamīñ par ab nahīñ un kā nishāñ tak

jalāyā sham.a sā us shola-rū ne

ga.e ghul soz-e-ġham se ustuḳhāñ tak

jahāñ kī sair kī 'sayyah' ham ne

na pahuñche par suḳhan ke qadr-dāñ tak

nahin milta dila hum ko nishan tak

makan DhunD aae us ka la-makan tak

bana har mu-e-tan KHar-e-mughilan

sataya josh-e-wahshat ne yahan tak

hamari jaan ke pichhe paDa hai

dil-e-nadan ko samjhaen kahan tak

rawan shab ko hua kya naqa-e-ruh

nazar aai na gard-e-karwan tak

zamin pe zalzala aaya to pahuncha

mere nalon ka ghaugha aasman tak

mile hai dil ko zauq-e-bosa-e-lab

maza hai warna har shai ka zaban tak

jo rakhte the dimagh apna falak par

zamin par ab nahin un ka nishan tak

jalaya shama sa us shola-ru ne

gae ghul soz-e-gham se ustuKHan tak

jahan ki sair ki 'sayyah' hum ne

na pahunche par suKHan ke qadr-dan tak