nahin nikle zaban se un ke dhoke mein jo han ho kar

nahīñ nikle zabāñ se un ke dhoke meñ jo haañ ho kar

gumāñ badle yaqīñ ho kar yaqīñ badle gumāñ ho kar

khaTaktā huuñ zamāne kī nazar meñ nīm-jāñ ho kar

mohabbat meñ huā kāñTā za.īf-o-nā-tavāñ ho kar

diyā dars-e-amal duniyā ko sargarm-e-fuġhāñ ho kar

jagāyā mere nāloñ ne zamāne ko azaañ ho kar

chhupā.e se kahīñ chhuptā hai jalva husn-e-fitrat kā

ayaañ hai vo nihāñ ho kar nihāñ hai vo ayaañ ho kar

ye hai ejāz-e-ulfat aaj tak āshiq jo zinda hai

vagar na miT chukā hotā vo benām-o-nishāñ ho kar

bhalā is tarah kā jiinā bhī hai jiinā koī 'sho.ala'

nigāhoñ meñ subuk ho kar zamāne par garāñ ho kar

nahin nikle zaban se un ke dhoke mein jo han ho kar

guman badle yaqin ho kar yaqin badle guman ho kar

khaTakta hun zamane ki nazar mein nim-jaan ho kar

mohabbat mein hua kanTa zaif-o-na-tawan ho kar

diya dars-e-amal duniya ko sargarm-e-fughan ho kar

jagaya mere nalon ne zamane ko azan ho kar

chhupae se kahin chhupta hai jalwa husn-e-fitrat ka

ayan hai wo nihan ho kar nihan hai wo ayan ho kar

ye hai ejaz-e-ulfat aaj tak aashiq jo zinda hai

wagar na miT chuka hota wo benam-o-nishan ho kar

bhala is tarah ka jina bhi hai jina koi 'shoala'

nigahon mein subuk ho kar zamane par garan ho kar