nahin shauq-e-KHaridari mein dauDe ja raha hai

nahīñ shauq-e-ḳharīdārī meñ dauḌe jā rahā hai

ye gāhak sair-e-bāzārī meñ dauḌe jā rahā hai

mayassar kuchh nahīñ hai khel meñ lā-hāsilī ke

yūñhī be-kār bekārī meñ dauḌe jā rahā hai

uThā.e phir rahā hai kotvāl-e-umr chābuk

badan majbūr lāchārī meñ dauḌe jā rahā hai

khaḌī hai manfa.at hairān bāhar dā.ere se

ziyāñ apnī ziyāñ-kārī meñ dauḌe jā rahā hai

Thaharnā bhī kahāñ hai sahl in sayyārgāñ ko

na sābit se hī sayyārī meñ dauḌe jā rahā hai

utārā ḳhvāhishoñ kā hai izāfī bojh sar se

to āsānī se dushvārī meñ dauḌe jā rahā hai

nahīñ himmat ki jis meñ ho zamāne ke muqābil

vo apne ghar kī rahdārī meñ dauḌe jā rahā hai

nahīñ miltā magar rauzan ki nikle 'aks bāhar

pas-e-ā.īna-zañgārī meñ dauḌe jā rahā hai

sameTā jhuuT kī parkār ne hai pesh-o-pas ko

ki ab har sach riyā-kārī meñ dauḌe jā rahā hai

ḳhabar hai rut badalne kī agar rashk-e-sabā vo

ḳhirām-andāz gulzārī meñ dauḌe jā rahā hai

nahin shauq-e-KHaridari mein dauDe ja raha hai

ye gahak sair-e-bazari mein dauDe ja raha hai

mayassar kuchh nahin hai khel mein la-hasili ke

yunhi be-kar bekari mein dauDe ja raha hai

uThae phir raha hai kotwal-e-umr chabuk

badan majbur lachaari mein dauDe ja raha hai

khaDi hai manfat hairan bahar daere se

ziyan apni ziyan-kari mein dauDe ja raha hai

Thaharna bhi kahan hai sahl in sayyargan ko

na sabit se hi sayyari mein dauDe ja raha hai

utara KHwahishon ka hai izafi bojh sar se

to aasani se dushwari mein dauDe ja raha hai

nahin himmat ki jis mein ho zamane ke muqabil

wo apne ghar ki rahdari mein dauDe ja raha hai

nahin milta magar rauzan ki nikle 'aks bahar

pas-e-aina-zangari mein dauDe ja raha hai

sameTa jhuT ki parkar ne hai pesh-o-pas ko

ki ab har sach riya-kari mein dauDe ja raha hai

KHabar hai rut badalne ki agar rashk-e-saba wo

KHiram-andaz gulzari mein dauDe ja raha hai