نہیں سیکھا طریق نالہ و آہ و فغاں میں نے

نہیں سیکھا طریق نالہ و آہ و فغاں میں نے

محبت کو سکھائی ہے محبت کی زباں میں نے

کچھ ایسی برق زن دیکھی بلائے ناگہاں میں نے

اٹھا دی سہم کر رسم بنائے آشیاں میں نے

مری فطرت نے سیکھا ہے کشاکش گیر غم ہونا

محبت کو نوازا ہے بہ ذوق امتحاں میں نے

یہ اک ترمیم کی ہے لازمی آئین الفت میں

وفا محدود نہ کی ہے بقدر امتحاں میں نے

جہاں ہوتی ہیں کچھ آویزشیں یاس و تمنا میں

اک ایسی بھی خلش دیکھی ہے دل کے درمیاں میں نے

کبھی یوں بھی کیا ہے احترام جذبۂ جاناں

کہ اکثر خود سے خود کو کر لیا ہے بد گماں میں نے

زباں کو زحمتیں دیتا نہیں اب میں تکلم کی

نظر کو کر دیا ہے واقف رمز بیاں میں نے

کسی سے کیا کہوں انجام عشق آتشیں احمرؔ

ہر اک موئے بدن میں جذب کر لی ہے فغاں میں نے