nahin tha zaKHm to aansu koi saja leta

nahīñ thā zaḳhm to aañsū koī sajā letā

kisī bahāne ġham-e-ābrū bachā letā

ḳhabar na thī ki siyāhī kā jaal phailegā

lahū kī aag sar-e-shām hī jalā letā

zabāñ pe harf bhī aayā junūñ kā patthar bhī

maiñ be-libās thā kis kis kā aasrā letā

jagā diyā thā dukhoñ ke julūs ne varna

maiñ aaj dāman-e-shab-tāb se havā letā

palaT gayā koī lamha ThiThak ga.e haiñ qadam

koī jo saath nibhātā mirī duā letā

ye kal kī baat nahīñ aaj kī kahānī hai

vo aaj zaḳhm na hotā to maiñ chhupā letā

na jaane kaun sī manzil mirā makāñ hotī

ki maiñ vajūd kī gaThrī agar uThā letā

nahin tha zaKHm to aansu koi saja leta

kisi bahane gham-e-abru bacha leta

KHabar na thi ki siyahi ka jal phailega

lahu ki aag sar-e-sham hi jala leta

zaban pe harf bhi aaya junun ka patthar bhi

main be-libas tha kis kis ka aasra leta

jaga diya tha dukhon ke julus ne warna

main aaj daman-e-shab-tab se hawa leta

palaT gaya koi lamha ThiThak gae hain qadam

koi jo sath nibhata meri dua leta

ye kal ki baat nahin aaj ki kahani hai

wo aaj zaKHm na hota to main chhupa leta

na jaane kaun si manzil mera makan hoti

ki main wajud ki gaThri agar uTha leta