nahin ye aks hua hai samajhta kyun nahin main

nahīñ ye aks huā hai samajhtā kyuuñ nahīñ maiñ

mire qarīb khaḌā hai samajhtā kyuuñ nahīñ maiñ

ye chiiz aur nahīñ koī merā saayā hai

magar ye mujh se judā hai samajhtā kyuuñ nahīñ maiñ

ye koī pahlū mirā hai jo zaat se merī

ka.ī dinoñ se judā hai samajhtā kyuuñ nahīñ maiñ

jahāñ pe jism kī dīvār meñ shigāf paḌā

vahīñ se sabza ugā hai samajhtā kyuuñ nahīñ maiñ

tumhārī aañkh se maiñ apne ḳhvāb dekhtā huuñ

yahī to merī sazā hai samajhtā kyuuñ nahīñ maiñ

phisaltī ret pe fihrist-e-ḳhvāb likhnī hai

ye imtihān kaḌā hai samajhtā kyuuñ nahīñ maiñ

dhuāñ huuñ pūchhtā huuñ vo gayā hai sho.ale par

ki sho.ala us pe gayā hai samajhtā kyuuñ nahīñ maiñ

tum apne-āp se kyuuñ iḳhtilāf karte ho

'shafaq' mo.āmla kyā hai samajhtā kyuuñ nahīñ maiñ

nahin ye aks hua hai samajhta kyun nahin main

mere qarib khaDa hai samajhta kyun nahin main

ye chiz aur nahin koi mera saya hai

magar ye mujh se juda hai samajhta kyun nahin main

ye koi pahlu mera hai jo zat se meri

kai dinon se juda hai samajhta kyun nahin main

jahan pe jism ki diwar mein shigaf paDa

wahin se sabza uga hai samajhta kyun nahin main

tumhaari aankh se main apne KHwab dekhta hun

yahi to meri saza hai samajhta kyun nahin main

phisalti ret pe fihrist-e-KHwab likhni hai

ye imtihan kaDa hai samajhta kyun nahin main

dhuan hun puchhta hun wo gaya hai shoale par

ki shoala us pe gaya hai samajhta kyun nahin main

tum apne-ap se kyun iKHtilaf karte ho

'shafaq' moamla kya hai samajhta kyun nahin main