nahin ye baat ki parwaz ka irada nahin

nahīñ ye baat ki parvāz kā irāda nahīñ

fazā-e-gulshan-e-hastī magar kushāda nahīñ

mizāj-e-ishq to apnā hai e'tidāl-pasand

yahī ravish hai kabhī kam nahīñ ziyāda nahīñ

ḳhizāñ meñ bhī mirā nashsha utar nahīñ saktā

ki ye hai josh-e-junūñ koī josh-e-bāda nahīñ

shu.ūr-o-fikr meñ āzād hai mizāj mirā

mire badan pe kisī aur kā labāda nahīñ

nigāh chāhiye tahrīr ho ḳhafī kī jalī

kitāb-e-zīst kā koī varaq bhī saada nahīñ

rah-e-hayāt meñ dānista misl-e-sham.a jale

hamārī zaat kā īsār be-irāda nahīñ

na zād-e-rāh kī ḳhvāhish na rāhbar kī talab

hamāre vāste dushvār koī jaada nahīñ

paḌā jo vaqt to ġhairoñ ne merā saath diyā

mire sharīk mire ahl-e-ḳhānvāda nahīñ

bisāt-e-dahr pe kyā chaal kāmyāb chale

tirī nazar meñ agar azmat-e-piyāda nahīñ

jahāñ meñ milne ko milte haiñ yuuñ to sab se 'lais'

magar kisī se bhī maqsūd istifāda nahīñ

nahin ye baat ki parwaz ka irada nahin

faza-e-gulshan-e-hasti magar kushada nahin

mizaj-e-ishq to apna hai e'tidal-pasand

yahi rawish hai kabhi kam nahin ziyaada nahin

KHizan mein bhi mera nashsha utar nahin sakta

ki ye hai josh-e-junun koi josh-e-baada nahin

shuur-o-fikr mein aazad hai mizaj mera

mere badan pe kisi aur ka labaada nahin

nigah chahiye tahrir ho KHafi ki jali

kitab-e-zist ka koi waraq bhi sada nahin

rah-e-hayat mein danista misl-e-shama jale

hamari zat ka isar be-irada nahin

na zad-e-rah ki KHwahish na rahbar ki talab

hamare waste dushwar koi jada nahin

paDa jo waqt to ghairon ne mera sath diya

mere sharik mere ahl-e-KHanwada nahin

bisat-e-dahr pe kya chaal kaamyab chale

teri nazar mein agar azmat-e-piyaada nahin

jahan mein milne ko milte hain yun to sab se 'lais'

magar kisi se bhi maqsud istifada nahin