nahin zamane mein hasil kahin Thikana mujhe

nahīñ zamāne meñ hāsil kahīñ Thikāna mujhe

kahāñ kahāñ liye phirtā hai āb-o-dāna mujhe

vo dekhte haiñ ba-andāz-e-mujrimāna mujhe

ki jin se pyaar hai ai dost vālihāna mujhe

jhulastī dhuup meñ ai kaash aisā vaqt aa.e

nasīb ho tirī palkoñ kā āshiyāna mujhe

kabhī rahā na ġharīboñ se vāsta jis ko

vo de gayā mirī mehnat kā mehnatāna mujhe

balā se jurm ho ho insāf kī nigāhoñ meñ

tumhārī baat to lagtī hai munsifāna mujhe

talāsh-e-rizq meñ aa.e na jis meñ kotāhī

ilāhī de vahī parvāz-e-tā.irāna mujhe

maiñ sāda-lauhī pe apnī huuñ mutma.in yaaro

ḳhudā ke vāste samjhe na koī daanā mujhe

mirī hayāt kī ye bhī ajiib uljhan hai

bhulānā tujh ko kabhī bhī lagā ravā na mujhe

kitāb dī thī sadāqat kī maañ ne hāthoñ meñ

safar pe pahle-pahal jab kiyā ravāna mujhe

ḳhudā kā shukr hai ai 'shauq' ab bhī zinda huuñ

satā rahā hai zamāne se ye zamānā mujhe

nahin zamane mein hasil kahin Thikana mujhe

kahan kahan liye phirta hai aab-o-dana mujhe

wo dekhte hain ba-andaz-e-mujrimana mujhe

ki jin se pyar hai ai dost walihana mujhe

jhulasti dhup mein ai kash aisa waqt aae

nasib ho teri palkon ka aashiyana mujhe

kabhi raha na gharibon se wasta jis ko

wo de gaya meri mehnat ka mehnatana mujhe

bala se jurm ho ho insaf ki nigahon mein

tumhaari baat to lagti hai munsifana mujhe

talash-e-rizq mein aae na jis mein kotahi

ilahi de wahi parwaz-e-tairana mujhe

main sada-lauhi pe apni hun mutmain yaro

KHuda ke waste samjhe na koi dana mujhe

meri hayat ki ye bhi ajib uljhan hai

bhulana tujh ko kabhi bhi laga rawa na mujhe

kitab di thi sadaqat ki man ne hathon mein

safar pe pahle-pahal jab kiya rawana mujhe

KHuda ka shukr hai ai 'shauq' ab bhi zinda hun

sata raha hai zamane se ye zamana mujhe