nai baat chheDo nae lafz Dhaalo

na.ī baat chheḌo na.e lafz Dhālo

na.e tiir pheñko na.e par nikālo

na.ī choT khānī paḌegī chaman meñ

na.e ġham kī socho nayā rog paalo

hamārī nigāheñ tumhārī taraf haiñ

hasīñ ḳhāl-o-ḳhushbū ke ruḳhsār vaalo

vafāoñ ko masrūf rakkho chaman meñ

uTho raushnī do vatan ke ujālo

agar chāhte ho mohabbat se rahnā

ye nafrat ye ġhībat ke patthar haTā lo

tumhārā zamāna tumhārī ḳhudā.ī

baḌho zindagī ke taqāze sa.mbhālo

zarūrī hai shīrāza-bandī chaman kī

'amal kar ke duniyā ko jannat banā lo

ḳhudā bhī mohabbat ḳhudī bhī mohabbat

uTho aaj kī baat kal par na Taalo

mohabbat kā har dard pā loge 'zaidī'

ḳhudā ko agar apne dil meñ basā lo

nai baat chheDo nae lafz Dhaalo

nae tir phenko nae par nikalo

nai choT khani paDegi chaman mein

nae gham ki socho naya rog palo

hamari nigahen tumhaari taraf hain

hasin KHal-o-KHushbu ke ruKHsar walo

wafaon ko masruf rakkho chaman mein

uTho raushni do watan ke ujalo

agar chahte ho mohabbat se rahna

ye nafrat ye ghibat ke patthar haTa lo

tumhaara zamana tumhaari KHudai

baDho zindagi ke taqaze sambhaalo

zaruri hai shiraaza-bandi chaman ki

'amal kar ke duniya ko jannat bana lo

KHuda bhi mohabbat KHudi bhi mohabbat

uTho aaj ki baat kal par na Talo

mohabbat ka har dard pa loge 'zaidi'

KHuda ko agar apne dil mein basa lo