nai bahaar nae gulsitan talash karo

na.ī bahār na.e gulsitāñ talāsh karo

phir us ke ba.ad na.e bāġhbāñ talāsh karo

yahāñ na māh-e-daraḳhshāñ na āftāb-e-hasīñ

tajalliyoñ ke na.e āsmāñ talāsh karo

jahāñ ke talḳh ġhamoñ se najāt kī ḳhātir

kisī ke gesū-e-ambar-fishāñ talāsh karo

yahāñ to barq kā pahra hai aur sarsar hai

pay-e-qayām na.e āshiyāñ talāsh karo

mushā.eron se natīja na she'r-goī se

rafīq-o-hamdam-e-urdu zabāñ talāsh karo

yahāñ to rahbar-o-rahzan meñ kuchh tamīz nahīñ

na.e amiir na.e kārvāñ talāsh karo

jahāñ meñ yuuñ to na guzregī zindagī 'shā.eq'

koī rafīq koī rāzdāñ talāsh karo

nai bahaar nae gulsitan talash karo

phir us ke baad nae baghban talash karo

yahan na mah-e-daraKHshan na aaftab-e-hasin

tajalliyon ke nae aasman talash karo

jahan ke talKH ghamon se najat ki KHatir

kisi ke gesu-e-ambar-fishan talash karo

yahan to barq ka pahra hai aur sarsar hai

pay-e-qayam nae aashiyan talash karo

mushaeron se natija na she'r-goi se

rafiq-o-hamdam-e-urdu zaban talash karo

yahan to rahbar-o-rahzan mein kuchh tamiz nahin

nae amir nae karwan talash karo

jahan mein yun to na guzregi zindagi 'shaeq'

koi rafiq koi raazdan talash karo