nai bazm-e-aish-o-nashat mein ye maraz suna hai ki aam hai

na.ī bazm-e-aish-o-nashāt meñ ye maraz sunā hai ki aam hai

kisī lomḌī ko malaria kisī meñDkī ko zukām hai

ye ajiib sāqī-e-māh-vash tire mai-kade kā nizām hai

huā jaise tū bhī divāliya na to ḳhum na mai hai na jaam hai

yahāñ zikr-e-āb-o-ta.ām kyā yahāñ khānā piinā harām hai

yahāñ bart rakhte haiñ roz sab yahāñ roz māh-e-siyām hai

na to muttafiq kisī amr meñ na to muttahid kisī kaam meñ

mire leaderoñ kā dimāġh hai ki himāqatoñ kā godām hai

abhī hai ġharīboñ kī chashm tar abhī un ke haal pe ik nazar

abe inqalāb Thahar zarā abhī tujh se aur bhī kaam hai

maiñ sunā chukā huuñ hazār baar unheñ dard-o-yās kī dāstāñ

na yaqīn ho to vo pūchh leñ ki gavāh telegram hai

abhī us ko jism to dhakne do abhī us ko peT to bharne do

abhī us ko fikr-e-avām kyā abhī nañgā bhūkā nizām hai

vahī ḳhādimāna ravish rahe ye ḳhayāl-e-rahbarī chhoḌ do

ise pī sakoge na dost tum ye bahut hī gāḌhā qavām hai

tujhe apne aur parā.e kā nahīñ kuchh shu.ūr abhī talak

mire jāñ-nisāroñ kī lisT meñ zarā dekh terā bhī naam hai

bhalā 'shauq' un se dabeñge kyā bhalā 'shauq' un se Dareñge kyā

bhalā 'shauq' dar se uTheñge kyā ye ḳhayāl dost kā ḳhaam hai

nai bazm-e-aish-o-nashat mein ye maraz suna hai ki aam hai

kisi lomDi ko malaria kisi meinDki ko zukaam hai

ye ajib saqi-e-mah-wash tere mai-kade ka nizam hai

hua jaise tu bhi diwaliya na to KHum na mai hai na jam hai

yahan zikr-e-ab-o-taam kya yahan khana pina haram hai

yahan bart rakhte hain roz sab yahan roz mah-e-siyam hai

na to muttafiq kisi amr mein na to muttahid kisi kaam mein

mere leaderon ka dimagh hai ki himaqaton ka godam hai

abhi hai gharibon ki chashm tar abhi un ke haal pe ek nazar

abe inqalab Thahar zara abhi tujh se aur bhi kaam hai

main suna chuka hun hazar bar unhen dard-o-yas ki dastan

na yaqin ho to wo puchh len ki gawah telegram hai

abhi us ko jism to dhakne do abhi us ko peT to bharne do

abhi us ko fikr-e-awam kya abhi nanga bhuka nizam hai

wahi KHadimana rawish rahe ye KHayal-e-rahbari chhoD do

ise pi sakoge na dost tum ye bahut hi gaDha qawam hai

tujhe apne aur parae ka nahin kuchh shuur abhi talak

mere jaan-nisaron ki lisT mein zara dekh tera bhi nam hai

bhala 'shauq' un se dabenge kya bhala 'shauq' un se Darenge kya

bhala 'shauq' dar se uThenge kya ye KHayal dost ka KHam hai