nai duniya nae manzar nae afkar mile

na.ī duniyā na.e manzar na.e afkār mile

sab shajar naql-e-makānī ke samar-bār mile

bād-e-hijrat tū hameñ le ke jahāñ aa.ī hai

in galī-kūchoñ meñ insānoñ ke shahkār mile

ḳhūbsūrat se kisī baar ke ik goshe meñ

dil kī tanhā.ī miTāne ko ka.ī yaar mile

kahīñ kho jaane kā dukh ek haqīqat hī sahī

apnī pahchān ke bhī nit-na.e āsār mile

kab talak sar pe virāsat kī ridā le ke chaleñ

kyuuñ na ab ham ko koī sāya-e-dīvār mile

nai duniya nae manzar nae afkar mile

sab shajar naql-e-makani ke samar-bar mile

baad-e-hijrat tu hamein le ke jahan aai hai

in gali-kuchon mein insanon ke shahkar mile

KHubsurat se kisi bar ke ek goshe mein

dil ki tanhai miTane ko kai yar mile

kahin kho jaane ka dukh ek haqiqat hi sahi

apni pahchan ke bhi nit-nae aasar mile

kab talak sar pe wirasat ki rida le ke chalen

kyun na ab hum ko koi saya-e-diwar mile