nai hayat naya saz de raha hun main

na.ī hayāt nayā saaz de rahā huuñ maiñ

dil-e-shikasta ko āvāz de rahā huuñ maiñ

hai faḳhr ye ki mirī zindagī hai ijz-o-niyāz

ġhurūr ye ki tumheñ naaz de rahā huuñ maiñ

tirī hasīn jafāoñ se le ke dars-e-vafā

junūñ ko kuchh na.e andāz de rahā huuñ maiñ

ye kis maqām pe le aa.ī be-ḳhudī ki tumheñ

ḳhud apne naam se āvāz de rahā huuñ maiñ

kaTe hue jo par-o-bāl haiñ unheñ 'nashtar'

nazar se quvvat-e-parvāz de rahā huuñ maiñ

nai hayat naya saz de raha hun main

dil-e-shikasta ko aawaz de raha hun main

hai faKHr ye ki meri zindagi hai ijz-o-niyaz

ghurur ye ki tumhein naz de raha hun main

teri hasin jafaon se le ke dars-e-wafa

junun ko kuchh nae andaz de raha hun main

ye kis maqam pe le aai be-KHudi ki tumhein

KHud apne nam se aawaz de raha hun main

kaTe hue jo par-o-baal hain unhen 'nashtar'

nazar se quwwat-e-parwaz de raha hun main