nai manzilon ko pa lo mere naqsh-e-pa pe chal ke

na.ī manziloñ ko pā lo mire naqsh-e-pā pe chal ke

maiñ banā chukī huuñ logo vo jo rāste haiñ kal ke

mujhe bahr-e-ġham meñ pā kar na hañso ai hañsne vaalo

koī mauj le na Duube kahīñ tum ko bhī uchhal ke

tirī aarzū se baḌh kar koī aarzū nahīñ hai

maiñ tujhī ko DhūñDhtī huuñ tire ġham ke saath chal ke

kahīñ dhuup ban gayā hai kahīñ raat kā añdherā

mirā dil jo bujh gayā hai tirī anjuman meñ jal ke

chalo sab fareb hogā ye ḳhayāl-e-dair-o-ka.aba

koī vo jagah batā de jahāñ jaa.eñ ham nikal ke

na koī mirā Thikāna na hai koī merī manzil

tujhe kyā milā zamāne mirī zindagī badal ke

ye Dhaleñge chāñdnī meñ ka.ī ghar kareñge raushan

jo charāġh bujh ga.e haiñ sar-e-shām hī se jal ke

kahīñ zindagī banī hai kahīñ zindagī kī dhaḌkan

koī 'shā.era' jo hasrat bahī āñsuoñ meñ Dhal ke

nai manzilon ko pa lo mere naqsh-e-pa pe chal ke

main bana chuki hun logo wo jo raste hain kal ke

mujhe bahr-e-gham mein pa kar na hanso ai hansne walo

koi mauj le na Dube kahin tum ko bhi uchhal ke

teri aarzu se baDh kar koi aarzu nahin hai

main tujhi ko DhunDhti hun tere gham ke sath chal ke

kahin dhup ban gaya hai kahin raat ka andhera

mera dil jo bujh gaya hai teri anjuman mein jal ke

chalo sab fareb hoga ye KHayal-e-dair-o-kaba

koi wo jagah bata de jahan jaen hum nikal ke

na koi mera Thikana na hai koi meri manzil

tujhe kya mila zamane meri zindagi badal ke

ye Dhalenge chandni mein kai ghar karenge raushan

jo charagh bujh gae hain sar-e-sham hi se jal ke

kahin zindagi bani hai kahin zindagi ki dhaDkan

koi 'shaera' jo hasrat bahi aansuon mein Dhal ke