nai poshak pahne hai purane KHwab ki hasrat

na.ī poshāk pahne hai purāne ḳhvāb kī hasrat

maiñ hañs kar Taal detī huuñ dil-e-betāb kī hasrat

mohabbat aur kyā hai ik sarāb-e-tishnagī to hai

vahī sahrā kī cham-cham meñ chamakte aab kī hasrat

nayā kirdār gaḌ.h kar maiñ kahānī hī badal detī

magar puurī na ho paa.ī na.e ik baab kī hasrat

tumhārī yaad kā gahrā ta.alluq āñsuoñ se hai

mirī palkoñ ko kyā hogī kisī sailāb kī hasrat

bas itnā soch kar is or kashtī moḌ dī maiñ ne

nikal jaa.e na kyoñ kar is dafa girdāb kī hasrat

zamīñ pe thak ke gir jā.ūñ to shāyad niiñd aa jaa.e

ki in āñkhoñ ko hai ik umr se ik ḳhvāb kī hasrat

nai poshak pahne hai purane KHwab ki hasrat

main hans kar Tal deti hun dil-e-betab ki hasrat

mohabbat aur kya hai ek sarab-e-tishnagi to hai

wahi sahra ki cham-cham mein chamakte aab ki hasrat

naya kirdar gaDh kar main kahani hi badal deti

magar puri na ho pai nae ek bab ki hasrat

tumhaari yaad ka gahra talluq aansuon se hai

meri palkon ko kya hogi kisi sailab ki hasrat

bas itna soch kar is or kashti moD di main ne

nikal jae na kyon kar is dafa girdab ki hasrat

zamin pe thak ke gir jaun to shayad nind aa jae

ki in aankhon ko hai ek umr se ek KHwab ki hasrat