نئی رتوں کا جواں حوصلہ بھی ختم ہوا

نئی رتوں کا جواں حوصلہ بھی ختم ہوا

شجر کے گرنے سے زور ہوا بھی ختم ہوا

بہت ہی دور ہوئے جستجو میں منزل کی

تھکے ہیں پاؤں کہ اب راستہ بھی ختم ہوا

تمہارے بعد تواضع نہیں ہے مہماں کی

تمہارے گھر سے تو یہ سلسلہ بھی ختم ہوا

بہت طویل سفر زندگی کا لگتا ہے

کہ والدین کا اب آسرا بھی ختم ہوا

بہت ہی دیر ہوئی مہرباں کے آنے میں

ہتھیلیوں سے وہ رنگ حنا بھی ختم ہوا

مزاج شہر بدلنے لگا بہت اب تو

سیہ قلوب سے خوف خدا بھی ختم ہوا

ہر ایک شخص کا رشتہ غرض سے وابستہ

عظیمؔ شہر سے پاس وفا بھی ختم ہوا