nai ruton ka jawan hausla bhi KHatm hua

na.ī rutoñ kā javāñ hausla bhī ḳhatm huā

shajar ke girne se zor-e-havā bhī ḳhatm huā

bahut hī duur hue justujū meñ manzil kī

thake haiñ paañv ki ab rāsta bhī ḳhatm huā

tumhāre baad tavāzo nahīñ hai mehmāñ kī

tumhāre ghar se to ye silsila bhī ḳhatm huā

bahut tavīl safar zindagī kā lagtā hai

ki vāldain kā ab aasrā bhī ḳhatm huā

bahut hī der huī mehrbāñ ke aane meñ

hatheliyoñ se vo rang-e-hinā bhī ḳhatm huā

mizāj-e-shahr badalne lagā bahut ab to

siyah qulūb se ḳhauf-e-ḳhudā bhī ḳhatm huā

har ek shaḳhs kā rishta ġharaz se vābasta

'azīm' shahr se pās-e-vafā bhī ḳhatm huā

nai ruton ka jawan hausla bhi KHatm hua

shajar ke girne se zor-e-hawa bhi KHatm hua

bahut hi dur hue justuju mein manzil ki

thake hain panw ki ab rasta bhi KHatm hua

tumhaare baad tawazo nahin hai mehman ki

tumhaare ghar se to ye silsila bhi KHatm hua

bahut tawil safar zindagi ka lagta hai

ki waldain ka ab aasra bhi KHatm hua

bahut hi der hui mehrban ke aane mein

hatheliyon se wo rang-e-hina bhi KHatm hua

mizaj-e-shahr badalne laga bahut ab to

siyah qulub se KHauf-e-KHuda bhi KHatm hua

har ek shaKHs ka rishta gharaz se wabasta

'azim' shahr se pas-e-wafa bhi KHatm hua