نئی تہذیب کرتی ہے خلاف عقل من مانی

نئی تہذیب کرتی ہے خلاف عقل من مانی

عجب کیا ہے اگر سمجھے یہ دنیا آگ کو پانی

ملی ہیں کھردری سچائیاں اکثر زبانوں پر

فقیروں کو میسر ہیں کہاں آداب سلطانی

تجھے اے زندگی آسودہ کرنے کے لیے میں نے

بہت پاپڑ بھی بیلے در بدر کی خاک بھی چھانی

مری نادانیوں پہ ہنسنے والے کاش یہ سوچیں

کبھی ان سے نہیں سرزد ہوئی کیا کوئی نادانی

بشر نے رائیگاں کی زندگی مایا کے چکر میں

نہ اپنے آپ کو پرکھا نہ اپنی ذات پہچانی

ترے ہی ذکر سے ہم کو سکوں مل جاتا ہے ورنہ

نہیں جاتی ہمارے قلب مضطر کی پریشانی

اگرچہ مسئلے ہوتے رہے حل وقت پر بیدلؔ

پڑی ہیں پھر بھی اکثر زندگی میں ٹھوکریں کھانی