nai tahzib se bachchon ko bachaun kaise

na.ī tahzīb se bachchoñ ko bachā.ūñ kaise

ḳhud to bigḌā huuñ zamāne ko banā.ūñ kaise

vo na dekhe merī jānib to nahīñ us kī ḳhatā

maiñ añdhere meñ paḌā huuñ nazar aa.uuñ kaise

mere āñgan meñ to aa.ī hī nahīñ mauj-e-bahār

koī phūloñ se bharā giit sunā.ūñ kaise

chāhtā to huuñ ki dekhūñ pas-e-parda kyā hai

dastaras jis pe na ho us ko uThā.ūñ kaise

par nikalte hī koī us ko katar detā hai

apne bachchoñ ko fazāoñ meñ uḌā.ūñ kaise

vaqt mahdūd diyā kaam diyā lā-mahdūd

zindagī bol tirā qarz chukā.ūñ kaise

jism par choT lagī ho to dikhā.ūñ 'māhir'

dil pe jo choT lagī hai vo dikhā.ūñ kaise

nai tahzib se bachchon ko bachaun kaise

KHud to bigDa hun zamane ko banaun kaise

wo na dekhe meri jaanib to nahin us ki KHata

main andhere mein paDa hun nazar aaun kaise

mere aangan mein to aai hi nahin mauj-e-bahaar

koi phulon se bhara git sunaun kaise

chahta to hun ki dekhun pas-e-parda kya hai

dastaras jis pe na ho us ko uThaun kaise

par nikalte hi koi us ko katar deta hai

apne bachchon ko fazaon mein uDaun kaise

waqt mahdud diya kaam diya la-mahdud

zindagi bol tera qarz chukaun kaise

jism par choT lagi ho to dikhaun 'mahir'

dil pe jo choT lagi hai wo dikhaun kaise