nai zamin ata ho naya makan bhi bane

na.ī zamīn atā ho nayā makāñ bhī bane

hamāre hijr kā kuchh munfarid nishāñ bhī bane

chubho liyā tirī chūḌī kā shīsha āñkhoñ meñ

hamārī aañkh kā naqsha lahūluhāñ bhī bane

tamām hijr-zada log mere saath chaleñ

firāq-e-yār ke māroñ kā kārvāñ bhī bane

koī sila nahīñ paayā tumhārī chāhat meñ

tumhāre vāste logoñ meñ bad-zabāñ bhī bane

bahār aa.ī hai phūloñ se lad ga.iiñ shāḳheñ

hamāre naam kā ik ġhuncha-e-dahāñ bhī bane

ugā rahā huuñ na.e peḌ ghar ke āñgan meñ

koī to ho jo mire ghar kā sā.ebāñ bhī bane

hunar na ilm na aql-o-shu.ūr thā 'faisal'

kuchh aise log yahāñ mīr-e-kārvāñ bhī bane

nai zamin ata ho naya makan bhi bane

hamare hijr ka kuchh munfarid nishan bhi bane

chubho liya teri chuDi ka shisha aankhon mein

hamari aankh ka naqsha lahuluhan bhi bane

tamam hijr-zada log mere sath chalen

firaq-e-yar ke maron ka karwan bhi bane

koi sila nahin paya tumhaari chahat mein

tumhaare waste logon mein bad-zaban bhi bane

bahaar aai hai phulon se lad gain shaKHen

hamare nam ka ek ghuncha-e-dahan bhi bane

uga raha hun nae peD ghar ke aangan mein

koi to ho jo mere ghar ka saeban bhi bane

hunar na ilm na aql-o-shuur tha 'faisal'

kuchh aise log yahan mir-e-karwan bhi bane