nairangi-e-bahaar-e-junun hum bhi dekh len

nairangī-e-bahār-e-junūñ ham bhī dekh leñ

kyā gul khilā.e girya-e-shabnam bhī dekh leñ

sunte haiñ vo hai dushman-e-īmān-o-āgahī

mauj-e-mai-e-nashāt kā aalam bhī dekh leñ

le sar uThā rahe haiñ tire āstāñ se ham

hotā hai kaun ishq kā mahram bhī dekh leñ

shāyad ġham-e-jahāñ ke asīroñ ko raas aa.e

āshuftagī-e-gesu-e-pur-ḳham bhī dekh leñ

paalā paḌā hai husn-e-taġhāful-shi.ār se

zabt-e-junūn-e-ishq kā dam-ḳham bhī dekh leñ

āvārgī-e-fasl-e-chaman chaar din sahī

kuchh irtibāt-e-sho.ala-o-shabnam bhī dekh leñ

tere ḳhayāl hī se na hoñ rāhateñ tamām

tujh ko bhulā ke ishq kā aalam bhī dekh leñ

muddat huī ki aañkh se Tapkā nahīñ lahū

kis haal meñ haiñ ahl-e-vafā ham bhī dekh leñ

vo jin ko e'timād-e-ḳhulūs-e-vafā nahīñ

furqat meñ chashm-e-nāz ko pur-nam bhī dekh leñ

nairangi-e-bahaar-e-junun hum bhi dekh len

kya gul khilae girya-e-shabnam bhi dekh len

sunte hain wo hai dushman-e-iman-o-agahi

mauj-e-mai-e-nashat ka aalam bhi dekh len

le sar uTha rahe hain tere aastan se hum

hota hai kaun ishq ka mahram bhi dekh len

shayad gham-e-jahan ke asiron ko ras aae

aashuftagi-e-gesu-e-pur-KHam bhi dekh len

pala paDa hai husn-e-taghaful-shiar se

zabt-e-junun-e-ishq ka dam-KHam bhi dekh len

aawargi-e-fasl-e-chaman chaar din sahi

kuchh irtibaat-e-shoala-o-shabnam bhi dekh len

tere KHayal hi se na hon rahaten tamam

tujh ko bhula ke ishq ka aalam bhi dekh len

muddat hui ki aankh se Tapka nahin lahu

kis haal mein hain ahl-e-wafa hum bhi dekh len

wo jin ko e'timad-e-KHulus-e-wafa nahin

furqat mein chashm-e-naz ko pur-nam bhi dekh len