nairangi-e-nashat-e-tamanna ajib hai

nairañgī-e-nashāt-e-tamannā ajiib hai

kuchh shaam se qafas meñ ujālā ajiib hai

sharmā rahe haiñ tār-e-garebān-e-chāk-e-dil

kuchh din se rañg-e-lāla-e-sahrā ajiib hai

har ḳhvāb-e-e'tibār shikastoñ se chuur hai

dil meñ magar ġhurūr-e-tamannā ajiib hai

saarā badan hai dhuup meñ jhulsā huā magar

dil par jo paḌ rahā hai vo saaya ajiib hai

pheñke nahīñ haiñ aaj talak reza-hā-e-dil

TuuTe ta.alluqāt kā rishta ajiib hai

jab tak nazar na kījiye yak qatra ḳhuuñ hai dil

lekin jo dekhiye to ye duniyā ajiib hai

'aḳhtar' ye tere paañv ke kāñTe na.e nahīñ

kāñToñ se kheltā huā chhālā ajiib hai

nairangi-e-nashat-e-tamanna ajib hai

kuchh sham se qafas mein ujala ajib hai

sharma rahe hain tar-e-gareban-e-chaak-e-dil

kuchh din se rang-e-lala-e-sahra ajib hai

har KHwab-e-e'tibar shikaston se chur hai

dil mein magar ghurur-e-tamanna ajib hai

sara badan hai dhup mein jhulsa hua magar

dil par jo paD raha hai wo saya ajib hai

phenke nahin hain aaj talak reza-ha-e-dil

TuTe talluqat ka rishta ajib hai

jab tak nazar na kijiye yak qatra KHun hai dil

lekin jo dekhiye to ye duniya ajib hai

'aKHtar' ye tere panw ke kanTe nae nahin

kanTon se khelta hua chhaala ajib hai