najat gham se nahin hai mumkin mafar alam se kabhi nahin hai

najāt ġham se nahīñ hai mumkin mafar alam se kabhī nahīñ hai

agar yahī ziist hai to is se nibāh kuchh dil-lagī nahīñ hai

ḳhudā ko jaane ḳhudā na maane vo bandagī bandagī nahīñ hai

jo dard-e-qaum-o-vatan na jaane vo shā.erī shā.erī nahīñ hai

jo ik ishāre pe miT na jaa.e vo aadmī aadmī nahīñ hai

jo dūsroñ ke na kaam aa.e vo zindagī zindagī nahīñ hai

bahār aa.ī to hai chaman meñ ḳhizāñ kā lekin mizāj le kar

fasurda gul haiñ udaas ġhunche shagufta koī kalī nahīñ hai

gunāh kyoñ ziist ho na apnī tabāh aalam na ho to kyūñ-kar

jis auj par aadmī thā pahle us auj par aadmī nahīñ hai

sabā ba-sad-ehtirām un ko salām kahnā payām kahnā

abhī se aa kar vo kyā kareñge abhī to mahfil sajī nahīñ hai

yahī hai 'hasrat' kalām merā miTā añdherā huā saverā

kahīñ bhī ab tīrgī nahīñ hai koī bhī dil ab dukhī nahīñ hai

najat gham se nahin hai mumkin mafar alam se kabhi nahin hai

agar yahi zist hai to is se nibah kuchh dil-lagi nahin hai

KHuda ko jaane KHuda na mane wo bandagi bandagi nahin hai

jo dard-e-qaum-o-watan na jaane wo shaeri shaeri nahin hai

jo ek ishaare pe miT na jae wo aadmi aadmi nahin hai

jo dusron ke na kaam aae wo zindagi zindagi nahin hai

bahaar aai to hai chaman mein KHizan ka lekin mizaj le kar

fasurda gul hain udas ghunche shagufta koi kali nahin hai

gunah kyon zist ho na apni tabah aalam na ho to kyun-kar

jis auj par aadmi tha pahle us auj par aadmi nahin hai

saba ba-sad-ehtiram un ko salam kahna payam kahna

abhi se aa kar wo kya karenge abhi to mahfil saji nahin hai

yahi hai 'hasrat' kalam mera miTa andhera hua sawera

kahin bhi ab tirgi nahin hai koi bhi dil ab dukhi nahin hai