nam-e-tarsil ke soton ko chhupae rakkha

nam-e-tarsīl ke sotoñ ko chhupā.e rakkhā

mujh samā.at ne sadāoñ ko chhupā.e rakkhā

peḌ jalte rahe āvāra rahī gard-e-malāl

dhuup ne abr kī chhāñv ko chhupā.e rakkhā

taaq thā ḳhvāb thā tanhā.ī thī tārīkī thī

raat ne sirf charāġhoñ ko chhupā.e rakkhā

ishq meñ ham ne tamannāoñ kī vahdat ke liye

ek duuje se mizājoñ ko chhupā.e rakkhā

ai chaman-zād-e-shafaq nāz-e-gul-e-sarv-ḳhayāl

ham ne ḳhud meñ tire ḳhvāboñ ko chhupā.e rakkhā

ai yaqīñ-tāb-badan terī tarāshīdagī se

maiñ ne jhaḌtī huī poroñ ko chhupā.e rakkhā

dhuup ujlā.e mirā chehra ki maiñ bhī sochūñ

saa.e ne kaise ḳharāshoñ ko chhupā.e rakkhā

nam-e-tarsil ke soton ko chhupae rakkha

mujh samaat ne sadaon ko chhupae rakkha

peD jalte rahe aawara rahi gard-e-malal

dhup ne abr ki chhanw ko chhupae rakkha

taq tha KHwab tha tanhai thi tariki thi

raat ne sirf charaghon ko chhupae rakkha

ishq mein hum ne tamannaon ki wahdat ke liye

ek duje se mizajon ko chhupae rakkha

ai chaman-zad-e-shafaq naz-e-gul-e-sarw-KHayal

hum ne KHud mein tere KHwabon ko chhupae rakkha

ai yaqin-tab-badan teri tarashidagi se

main ne jhaDti hui poron ko chhupae rakkha

dhup ujlae mera chehra ki main bhi sochun

sae ne kaise KHarashon ko chhupae rakkha