nam hain wo aankhen bura ho ishq ki tasir ka

nam haiñ vo āñkheñ burā ho ishq kī tāsīr kā

dūsrā ruḳh kitnā dard-añgez hai tasvīr kā

vo mujassam husn-o-tamkīñ dil sarāpā dard-o-ġham

jaise 'saudā' ke qasā.ed aur taġhazzul 'mīr' kā

hind ke lāla-ruḳho az rū-e-ta.amīr-e-vatan

rañg har ḳhitte ko de do jannat-e-kashmīr kā

shauq kī āñkheñ haiñ akkās-e-bahār-e-husn-e-dost

dil sadā band-e-ġhinā-e-lahn hai taqrīr kā

tere ḳhat meñ bil-mushāfa ham-kalāmī ke maze

tarz hai maktūb-e-ġhālib meñ yahī tahrīr kā

idda.ā-e-ḳhud-shanāsī hai sarāsar be-mahal

muḳhtalif chehra ho jab har daur kī tasvīr kā

'mānī' fan meñ shaḳhsiyat hotī hai har fankār kī

shā.irī parda uThātī hai mirī tasvīr kā

nam hain wo aankhen bura ho ishq ki tasir ka

dusra ruKH kitna dard-angez hai taswir ka

wo mujassam husn-o-tamkin dil sarapa dard-o-gham

jaise 'sauda' ke qasaed aur taghazzul 'mir' ka

hind ke lala-ruKHo az ru-e-tamir-e-watan

rang har KHitte ko de do jannat-e-kashmir ka

shauq ki aankhen hain akkas-e-bahaar-e-husn-e-dost

dil sada band-e-ghina-e-lahn hai taqrir ka

tere KHat mein bil-mushafa ham-kalami ke maze

tarz hai maktub-e-ghaalib mein yahi tahrir ka

iddaa-e-KHud-shanasi hai sarasar be-mahal

muKHtalif chehra ho jab har daur ki taswir ka

'mani' fan mein shaKHsiyat hoti hai har fankar ki

shairi parda uThati hai meri taswir ka