نمی ہو جس کی آنکھوں میں وہ بنجر ہو نہیں سکتا

نمی ہو جس کی آنکھوں میں وہ بنجر ہو نہیں سکتا

جسے مٹی سے نسبت ہو وہ پتھر ہو نہیں سکتا

وہ ساحل ہو نہیں سکتا تلاطم کا ہو جس کو ڈر

جو ساحل سے نہ ٹکرائے سمندر ہو نہیں سکتا

نہ چھیڑے بادباں کو جو نہ ہی پتوار سے الجھے

کسی کشتی کو وہ طوفاں میسر ہو نہیں سکتا

وہ پھر اک لمس سے خوشبو سے یا آہٹ سے ہوتا ہے

جو جادو صرف نظروں سے اجاگر ہو نہیں سکتا

سکوں ہو پیار ہو یا پھر وہ چاہے خود خدا ہی ہو

اگر بھیتر نہیں ہے تو وہ باہر ہو نہیں سکتا

زمانہ بھر کی لاشوں پر بھی ہو جائے کھڑی نفرت

پر اس کا قد محبت کے برابر ہو نہیں سکتا