nami ho jis ki aankhon mein wo banjar ho nahin sakta

namī ho jis kī āñkhoñ meñ vo banjar ho nahīñ saktā

jise miTTī se nisbat ho vo patthar ho nahīñ saktā

vo sāhil ho nahīñ saktā talātum kā ho jis ko Dar

jo sāhil se na Takrā.e samundar ho nahīñ saktā

na chheḌe bādbāñ ko jo na hī patvār se uljhe

kisī kashtī ko vo tūfāñ mayassar ho nahīñ saktā

vo phir ik lams se ḳhushbū se yā aahaT se hotā hai

jo jaadū sirf nazroñ se ujāgar ho nahīñ saktā

sukūñ ho pyaar ho yā phir vo chāhe ḳhud ḳhudā hī ho

agar bhītar nahīñ hai to vo bāhar ho nahīñ saktā

zamāne bhar kī lāshoñ par bhī ho jaa.e khaḌī nafrat

par us kā qad mohabbat ke barābar ho nahīñ saktā

nami ho jis ki aankhon mein wo banjar ho nahin sakta

jise miTTi se nisbat ho wo patthar ho nahin sakta

wo sahil ho nahin sakta talatum ka ho jis ko Dar

jo sahil se na Takrae samundar ho nahin sakta

na chheDe baadban ko jo na hi patwar se uljhe

kisi kashti ko wo tufan mayassar ho nahin sakta

wo phir ek lams se KHushbu se ya aahaT se hota hai

jo jadu sirf nazron se ujagar ho nahin sakta

sukun ho pyar ho ya phir wo chahe KHud KHuda hi ho

agar bhitar nahin hai to wo bahar ho nahin sakta

zamane bhar ki lashon par bhi ho jae khaDi nafrat

par us ka qad mohabbat ke barabar ho nahin sakta