نقاب اپنے رخ سے اٹھایا تو ہوتا

نقاب اپنے رخ سے اٹھایا تو ہوتا

مجھے اپنا جلوہ دکھایا تو ہوتا

عبث چارہ سازوں کو دیتے ہو زحمت

یہاں تک کوئی اس کو لایا تو ہوتا

سر بزم ان کا بگڑنے سے مطلب

گناہ محبت بتایا تو ہوتا

ہر اک شے سے کیوں پھوٹ نکلی تجلی

چھپے تھے تو خود کو چھپایا تو ہوتا

نزاکت محبت کی پھر تم سمجھتے

کبھی بار الفت اٹھایا تو ہوتا

گل تر کی آغوش میں ہنسنے والے

مرے غم کدے میں بھی آیا تو ہوتا

یہ ممکن ہے وہ راہ پر آئیں جوہرؔ

کبھی قصۂ دل سنایا تو ہوتا