نقد دل لے کر پھرے ہم نقد جاں لے کر پھرے

نقد دل لے کر پھرے ہم نقد جاں لے کر پھرے

دل میں کیا کیا آرزوؤں کا جہاں لے کر پھرے

ایک بھی تو تیری بستی میں نہ تھا پرسان غم

ہم تو آنکھوں میں ہزاروں داستاں لے کر پھرے

ہم نہ ہوں گے تو ہمارے نقش پا کام آئیں گے

زندگی کو کیوں کوئی اب سرگراں لے کر پھرے

اے کلیم اپنی حکایات جنوں ہیں بے شمار

تم فقط اک طور ہی کی داستاں لے کر پھرے

کوئی بھی منزل نہ تھی نظروں میں جن کی اے ندیم

زندگی بھر قوم کا وہ کارواں لے کر پھرے

ایک وہ ہیں بن گئے ہیں خود کسی کی داستاں

ایک وہ ہیں جو کسی کی داستاں لے کر پھرے

خلوت ظلمات ہی میں شاعرہؔ دیکھا انہیں

جو نظر میں وسعت کون و مکاں لے کر پھرے