naqd-e-dil le kar phire hum naqd-e-jaan le kar phire

naqd-e-dil le kar phire ham naqd-e-jāñ le kar phire

dil meñ kyā kyā ārzūoñ kā jahāñ le kar phire

ek bhī to terī bastī meñ na thā pursān-e-ġham

ham to āñkhoñ meñ hazāroñ dāstāñ le kar phire

ham na hoñge to hamāre naqsh-e-pā kaam ā.eñge

zindagī ko kyoñ koī ab sargirāñ le kar phire

ai kalīm apnī hikāyāt-e-junūñ haiñ be-shumār

tum faqat ik tuur hī kī dāstāñ le kar phire

koī bhī manzil na thī nazroñ meñ jin kī ai nadīm

zindagī bhar qaum kā vo kārvāñ le kar phire

ek vo haiñ ban ga.e haiñ ḳhud kisī kī dāstāñ

ek vo haiñ jo kisī kī dāstāñ le kar phire

ḳhalvat-e-zulmāt hī meñ 'shā.era' dekhā unheñ

jo nazar meñ vus.at-e-kaun-o-makāñ le kar phire

naqd-e-dil le kar phire hum naqd-e-jaan le kar phire

dil mein kya kya aarzuon ka jahan le kar phire

ek bhi to teri basti mein na tha pursan-e-gham

hum to aankhon mein hazaron dastan le kar phire

hum na honge to hamare naqsh-e-pa kaam aaenge

zindagi ko kyon koi ab sargiran le kar phire

ai kalim apni hikayat-e-junun hain be-shumar

tum faqat ek tur hi ki dastan le kar phire

koi bhi manzil na thi nazron mein jin ki ai nadim

zindagi bhar qaum ka wo karwan le kar phire

ek wo hain ban gae hain KHud kisi ki dastan

ek wo hain jo kisi ki dastan le kar phire

KHalwat-e-zulmat hi mein 'shaera' dekha unhen

jo nazar mein wusat-e-kaun-o-makan le kar phire