naqqad apne aap ka be-lag aisa kaun hai

naqqād apne aap kā be-lāg aisā kaun hai

honā mirā ik vahm hai dekhūñ ye kahtā kaun hai

vo āftāb-e-husn hai jalve luTā.e jā.egā

us ko ab is se kyā ġharaz mushtāq kitnā kaun hai

vahdat hai ye bhī dīdanī maiñ huuñ nazar vo raushnī

go ye girah khultī nahīñ ā.īna kis kā kaun hai

maiñ apne gumbad kā makīñ saaya sā dekhā Dar gayā

ab kyā bitā.ūñ kyā sunā jab maiñ ne pūchhā kaun hai

bas ik havā kā pher hai vo bhī havā ho jā.egā

maiñ sochtā rah jā.ūñgā mujh meñ ye mujh sā kaun hai

merī nazar jis par paḌī ik rābtoñ kā Dher thā

phir vo jo apne aap ko kahtā hai tanhā kaun hai

ab fikr is kī kījiye duniyā rahegī yā nahīñ

ab is ko jaane dījiye duniyā meñ kaisā kaun hai

tah kī lagan ik Dhoñg hai bas tairnā aatā nahīñ

tah karne vaalā sat.h ko ye shaḳhs hotā kaun hai

ye bazm-e-dānish hai 'muhib' tasvīr-e-nafs-e-mutma.in

is bazm meñ chūn-o-charā shā.er kī suntā kaun hai

naqqad apne aap ka be-lag aisa kaun hai

hona mera ek wahm hai dekhun ye kahta kaun hai

wo aaftab-e-husn hai jalwe luTae jaega

us ko ab is se kya gharaz mushtaq kitna kaun hai

wahdat hai ye bhi didani main hun nazar wo raushni

go ye girah khulti nahin aaina kis ka kaun hai

main apne gumbad ka makin saya sa dekha Dar gaya

ab kya bitaun kya suna jab main ne puchha kaun hai

bas ek hawa ka pher hai wo bhi hawa ho jaega

main sochta rah jaunga mujh mein ye mujh sa kaun hai

meri nazar jis par paDi ek rabton ka Dher tha

phir wo jo apne aap ko kahta hai tanha kaun hai

ab fikr is ki kijiye duniya rahegi ya nahin

ab is ko jaane dijiye duniya mein kaisa kaun hai

tah ki lagan ek Dhong hai bas tairna aata nahin

tah karne wala sath ko ye shaKHs hota kaun hai

ye bazm-e-danish hai 'muhib' taswir-e-nafs-e-mutmain

is bazm mein chun-o-chara shaer ki sunta kaun hai