naqsh dil par kaisi kaisi suraton ka rah gaya

naqsh dil par kaisī kaisī sūratoñ kā rah gayā

kitnī lahreñ ham-safar thiiñ phir bhī pyāsā rah gayā

kaisī kaisī ḳhvāhisheñ mujh se judā hotī ga.iiñ

kis qadar ābād thā aur kitnā tanhā rah gayā

DhūñDne niklā thā āvāzoñ kī bastī meñ use

soch kar vīrāñ guzargāhoñ pe baiThā rah gayā

us se milnā yaad hai mil kar bichhaḌnā yaad hai

kyā batā saktā huuñ kyā jaatā rahā kyā rah gayā

maiñ ye kahtā huuñ ki har ruḳh se basar kī zindagī

zindagī kahtī hai har pahlū adhūrā rah gayā

ahd-e-rafta kī khudā.ī kis qadar mahñgī paḌī

jis jagah ūñchī imārat thī gaḌhā sā rah gayā

sirf itnī hai 'muzaffar' apnī rūdād-e-hayāt

maiñ zamāne ko zamāna mujh ko taktā rah gayā

naqsh dil par kaisi kaisi suraton ka rah gaya

kitni lahren ham-safar thin phir bhi pyasa rah gaya

kaisi kaisi KHwahishen mujh se juda hoti gain

kis qadar aabaad tha aur kitna tanha rah gaya

DhunDne nikla tha aawazon ki basti mein use

soch kar viran guzargahon pe baiTha rah gaya

us se milna yaad hai mil kar bichhaDna yaad hai

kya bata sakta hun kya jata raha kya rah gaya

main ye kahta hun ki har ruKH se basar ki zindagi

zindagi kahti hai har pahlu adhura rah gaya

ahd-e-rafta ki khudai kis qadar mahngi paDi

jis jagah unchi imarat thi gaDha sa rah gaya

sirf itni hai 'muzaffar' apni rudad-e-hayat

main zamane ko zamana mujh ko takta rah gaya