naqsh-e-taswir na wo sang ka paikar koi

naqsh-e-tasvīr na vo sañg kā paikar koī

us ko jab dekho badal jaatā hai manzar koī

kashish-e-harf-e-tabassum hai laboñ meñ rū-posh

gosha-e-chashm se hañstā hai sitamgar koī

jurra-e-āḳhir-e-mai hai ki girāñ-ḳhvābī-e-shab

chāñd sā Duub rahā hai mire andar koī

chaḌhte dariyā sā vo paikar vo ghaTā se gesū

rāsta dekh rahā hai mirā manzar koī

sadaf-e-bahr se niklī hai abhī laila-e-shab

apnī muTThī meñ chhupā.e hue gauhar koī

kho gayā phir kahīñ aflāk kī pahnā.ī meñ

der tak chamkā kiyā TuuTā huā par koī

saf-e-a.adā hai mire sāmne aur pusht pe haiñ

na farishte na abābīloñ kā lashkar koī

TuuT kar girtī hai uupar mire chaTTān ki hai

bai.at-e-sañg mire dast-e-hunar par koī

raat bhar tāqat-e-parvāz ugātī hai unheñ

kaaT detā hai sahar-dam mire shahpar koī

mere qātil ne baḌhā dī mire sach kī tauqīr

is sile ke liye mauzūñ thā payambar koī

aaj is qarya-e-vīrāñ meñ ye aahaT kaisī

dil ke andar hai koī aur na bāhar koī

kisī jhāḌī se kiran chhūTī hai sūraj kī ki 'zeb'

chamak uTThā hai kisī haath meñ ḳhanjar koī

naqsh-e-taswir na wo sang ka paikar koi

us ko jab dekho badal jata hai manzar koi

kashish-e-harf-e-tabassum hai labon mein ru-posh

gosha-e-chashm se hansta hai sitamgar koi

jurra-e-aKHir-e-mai hai ki giran-KHwabi-e-shab

chand sa Dub raha hai mere andar koi

chaDhte dariya sa wo paikar wo ghaTa se gesu

rasta dekh raha hai mera manzar koi

sadaf-e-bahr se nikli hai abhi laila-e-shab

apni muTThi mein chhupae hue gauhar koi

kho gaya phir kahin aflak ki pahnai mein

der tak chamka kiya TuTa hua par koi

saf-e-ada hai mere samne aur pusht pe hain

na farishte na ababilon ka lashkar koi

TuT kar girti hai upar mere chaTTan ki hai

baiat-e-sang mere dast-e-hunar par koi

raat bhar taqat-e-parwaz ugati hai unhen

kaT deta hai sahar-dam mere shahpar koi

mere qatil ne baDha di mere sach ki tauqir

is sile ke liye mauzun tha payambar koi

aaj is qarya-e-viran mein ye aahaT kaisi

dil ke andar hai koi aur na bahar koi

kisi jhaDi se kiran chhuTi hai suraj ki ki 'zeb'

chamak uTTha hai kisi hath mein KHanjar koi