naqsh karta ram-o-raftar inan-gir ko main

naqsh kartā ram-o-raftār ināñ-gīr ko maiñ

kaisā chhankātā huā chaltā huuñ zanjīr ko maiñ

ġhaib-o-ġhaflat kā idhar jashn manā luuñ to chalūñ

abhī tāḳhīr samajhtā nahīñ tāḳhīr ko maiñ

ḳhāmushī merī kuchh aisī hadaf āgāh nahīñ

baat be-bāt chalā detā huuñ is tiir ko maiñ

sātvāñ din magar achchhā nahīñ guzrā merā

chhe din ulTātā rahā parda-e-tāmīr ko maiñ

mauj-e-ḳhūñ mujh se bas ab shaam kī duurī par hai

kitne din aur bachā saktā huuñ shamshīr ko maiñ

darmiyāñ merā ilāqa hai batā.ūñ na batā.ūñ

ek tasvīr kā dukh dūsrī tasvīr ko maiñ

phir vo satr aatī hai jab asal likhī jaatī hai

mujh ko tahrīr miTā aatī hai tahrīr ko maiñ

kahāñ le jaane ko thī paañv kī zanjīr mujhe

kahāñ le aayā magar paañv kī zanjīr ko maiñ

nazm ho baiThā huuñ āhañg-daroñ ke hāthoñ

nazm kartā huā ik nāla-e-shab-gīr ko maiñ

naqsh karta ram-o-raftar inan-gir ko main

kaisa chhankata hua chalta hun zanjir ko main

ghaib-o-ghaflat ka idhar jashn mana lun to chalun

abhi taKHir samajhta nahin taKHir ko main

KHamushi meri kuchh aisi hadaf aagah nahin

baat be-baat chala deta hun is tir ko main

satwan din magar achchha nahin guzra mera

chhe din ulTata raha parda-e-tamir ko main

mauj-e-KHun mujh se bas ab sham ki duri par hai

kitne din aur bacha sakta hun shamshir ko main

darmiyan mera ilaqa hai bataun na bataun

ek taswir ka dukh dusri taswir ko main

phir wo satr aati hai jab asal likhi jati hai

mujh ko tahrir miTa aati hai tahrir ko main

kahan le jaane ko thi panw ki zanjir mujhe

kahan le aaya magar panw ki zanjir ko main

nazm ho baiTha hun aahang-daron ke hathon

nazm karta hua ek nala-e-shab-gir ko main