نقش و نگار زیست کا ساماں نہ کر سکے

نقش و نگار زیست کا ساماں نہ کر سکے

اپنا لہو جو صرف گلستاں نہ کر سکے

وہ کم نصیب جن کی خزاں میں کھلی تھی آنکھ

اندازۂ جمال بہاراں نہ کر سکے

ہر ایک ناخدا نے سفینوں پہ خیر سے

احسان وہ کئے ہیں جو طوفاں نہ کر سکے

اپنے بھی داغ دل مہ و انجم سے کم نہ تھے

یہ اور بات ہے کہ فروزاں نہ کر سکے

اس واسطے ہر اک کو نیا غم دیا گیا

کوئی کسی کے درد کا درماں نہ کر سکے

وہ غم گساریٔ غم دوراں کریں گے کیا

جو پاس خاطر غم دوراں نہ کر سکے

فاروقؔ تم نے خود کو مسلماں تو کر لیا

اس کفر ماجرا کو مسلماں نہ کر سکے